Мешітке барғанымызда алдымызда отырғандардың сәждеге еңкейгенде белі ашылып қалып жатады. Ол әурет жердің ашылуына жата ма?
Жауап:
Шариғатта әурет саналатын мүшелердің намазда немесе намаздан тыс жерлерде жабылуы – парыз. Ерлердің әурет жерлері: тізе мен кіндіктің арасы. Бұған Пайғамбарымыздың (с.ғ.с.):
عَوْرَةُ الرَّجُلِ مَا دُونَ سُرَّتِهِ حَتَّى يُجَاوِزَ رُكْبَتَيْهِ
«Ер адамның әуреті – кіндіктен төмен тізесінің астына дейінгі жер»[1], деген хадисі дәлел. Әйел үшін жүз, қол, тобыққа дейінгі аяқтан басқа барлық дене әурет.
Расулуллаһ (с.ғ.с.):
أَسْمَاءُ إِنَّ الْمَرْأَةَ إِذَا بَلَغَتْ الْمَحِيضَ لَمْ تَصْلُحَ أَنْ يُرَى مِنْهَا إِلَّا هَذَا وَهَذَا- وَأَشَارَ إِلَى وَجْهِهِ وَكَفَّيْهِ يَا
«Әсма! Әйел баласы балиғат жасына жеткен кезде оның мына мүшелерінен басқа жерлерінің көрінуі дұрыс болмайды. Аллаһ елшісі осы сөздерді айтқан кезде қолдары мен жүзіне ишарат еткен еді»[2] дейді.
Айша анамыздан (р.а.) жеткен бір хадисте:
لَا يَقْبَلُ اللّهُ صَلَاةَ امْرَأَةٍ حَاضَتْ إِلَّا بِخِمَارٍ
««Аллаһ етеккір көрген (яғни, балиғат жасына жеткен) әйелдің орамалсыз оқыған намазын қабыл алмайды»[3] – деп шашты да жабу керектігін айтқан.
Жабылуы қажет ағзаның төрттен бірінен артық бөлігі «Субханаллаһил-а¢зим» дейтіндей уақыт мөлшерінде еріксіз ашылып кетсе, намаз бұзылады. Ал егер өз еркімен біле-тұра ашқан жағдайда, сол сәтте-ақ намаз бұзылады. Сондай-ақ ашылып қалған ағза бірден жабылса, намаз бұзылмайды.
Егер намаз барысында тізе, немесе белі ашылса, намазға кедергі емес, өйткені ол төрттен бір мөлшерден аз болып саналады. Алайда ұзын киімі бола тұра белі немесе тізесі ашылатындай қысқа киім кию мәкрүһ. Абзалы, бел, тізе ашылмайтындай етіп киіну. Намаз оқу барысында тобығы ашылып қалса, әйел адамның намазы бұзылмайды. Тобығы мен тізесінің арасы бір ағза саналғандықтан, тобық ағзаның төртте бірінен аз болып табылады.
А.Ұтысхан