Жуырда аудандық мәдениет үйінде «Нақыпбекұлы Әуен» мешіт ұжымының ұйымдастыруымен Мәуліт мерекесі аталып өтілді. Онда Алла тағаланы ұлықтап, барша мұсылман қауымы ардақ тұтар Мұхаммед Пайғамбарымызға (с.ғ.с) салауат, мадақ жырлар мен әндер айтылып, оның өнегелі өмірі барынша насихатталды. Шымқаладан арнайы келген «Асыл мұра» тобы көрермендерге сахналық қойылымды ұсынып, кештің өн бойын мадақ ән-жырмен көмкеріп отырды. Әсіресе, діни мерекеге еңбектеген баладан, еңкейген қарияға дейін қатысты десек, артық айтқандық болмас. Жұмыс күні болғанына қарамастан мерекеге жиналған қауымның қарасы қалың болды.
Дәстүрлі мерекеде аудан әкімінің орынбасары Т.Дәрменбаев мұсылман қауымды осынау ұлы мерекемен құттықтаса, ал аудан имамы М.Өтепбергенов Мәуліт күнінің ерекшеліктері қысқаша тоқталып, жалпақ жұртқа мерекенің мән-мағынасын түсіндіре өтті. Сондай-ақ халыққа қалтқысыз қызмет етіп келе жатқан имамдар М.Мейманбаевты, М.Егізбековті және Е.Байбатшаевты алғыс хатпен марапаттады. Ал, Ақарыс ауылы, «Ақарыс» мешітінің имамы А.Оспанов пайғамбарымыз Мұхаммеддің (с.ғ.с.) өмірі мен өнегелі істері жайлы тағылымды уағыз айтты.
Мұнан соң діни әндерді орындаушы Жандос Мырзабеков бастаған «Асыл мұра» тобындағы әнші жігіттердің шырқауындағы «Аллаға мың шүкір», «Иман бер Алла» секілді имани әуезді әндер тыңдармандардың жүрегіне жол тапты. Кешті Шымқаладан осы мерекеге арнайы шақырылған асаба Бекзат Сәкенұлы көңілге ой салаларлық әсем сөздермен жүргізіп отырды. Әсіресе, бүгінгі таңда жастардың дінге бет бұра бастағандығы, халқымыздың имандылығы арта түскендігі жайлы мағыналы шумақтар мерекеге жиналған қауымның көңілінен шықты. Сондай-ақ Еркебұлан Өсербаев бастаған актер жігіттер «Тура жолдан адаспайық», «Кешірімді болайық», «Иманға бет бұрайық» атты көріністерді сахналады. Шынайы әрекеттен туған қойылым көрермендердің көзіне жас алдырды. Бұдан кейін көркемсөз оқудан облыстық байқаудың жеңімпазы Қазына Асқарқызы поэзиялық жанр бойынша «Иман берші Тәңірім» атты жыр шумағын оқыды. Оның өлеңінен дінге деген ықылас, Аллаһ тағалаға мадақ, Мұхаммед (с.ғ.с.) пайғамбарымызға деген сүйіспеншілік самалы есіп тұрды.
Ауданымызда Мәуліт мерекесі жыл өткен сайын өзгеше сипат алып келеді. Ең бастысы, бұл мерекені атап өтуде ұйымдастырылған іс-шаралар мазмұн жағынан байып, исламның асыл құндылықтарын насихаттауда түрлі тақырыптар қамтылып, халықтың ынта-ықыласын арттыруда. Осының барлығы ынтымақтың, бірліктің арқасында екенін, «бірлігі бар ел озатынын, бірлігі жоқ ел тозатынын» еске салды. Биылғы мерекенің жаңалығы, көрермендерге діни сұрақтар қойылып, ол сұрақтарға жауап берген жандарға сыйлықтар үлестірілді. Бұл жылдамдық пен имани білімділікті қажет ететін кезеңде «Әуен» мешіт-медресесінде тәлім алып жүрген шәкірттер мен М.Әуезов мектебінің оқушылары сауалдарға тез жауап беріп, белсенділік танытты. Мереке барысында Мәуліт күні туралы түсірілген қысқаметражды бейнефильм көрермендер назарына ұсынылды. Жиналған көпшілік бұл мереке жөнінде жан-жақты мағлұмат алды. Келушілерге демеушілер есебінен діни газеттер мен кітаптар, өлеңдер мен термелер жазылған аудио дискілер таратылды.
Бағлан НҰРАЛЫҰЛЫ.
Суретті түсірген М.САДЫҚБЕКОВ.
Print 
PDF
Бас Мүфти бағаны
Кітапхана
Санақ
Өзіңізге жүктеңіз
