Rabbısınıñ didarın körip, Onıñ razılığın tabudı maqsat twtqan mwsılman bwl ömirde sol maqsatına jetkizer, sauap jinauğa sebep bolatın är sätti, mümkindikti bos jibermeytini aqiqat. Wlı da Qwdiret iesi Allah Tağala kün men tündi jaratqanda olardı bir-birinen jaqsılıq, sauap twrğısınan artıq etken.
Sanaulı sağattar qalğan «Zül Hijja » ayı, Wlı da Qwdiret iesi Allah Tağalanıñ rahımımen, mwsılmandar üşin sauaptıñ nauqanı, jaqsılıqtardıñ közi! Bwl qasietti aydıñ alğaşqı on kündiginiñ artıqşılığına baylanıstı Ardaqtı Payğambarımız (oğan Allahtıñ igiligi men sälemi bolsın) bir hadisinde bılay degen: «Allah üşin, Zul-Hijja ayınıñ alğaşqı on küninde jasalğan igi isterden süykimdirek igi ister joq!» (äl-Buhari 2/162, Äbu Däud 2438, ät-Tirmizi 757).
Endeşe, qwrmetti mwsılmandar, ahıretimiz üşin azıq, Qiyamettiñ tarazısında auır sauap jinauğa sebep bolatın bwl on kündik mümkindikten qwr qalmayıq!
Kündelikti küybeleñ tirşilikte jürip bwl jaqsılıqtar mümkindigin bos jiberip almauımız üşin bwl qısqa ğana merzimniñ är sätin sauappen ötkizuimiz läzim. Endeşe tömende osı on kündikti meylinşe paydalı jäne sauaptı ötkizuge jetkizer amaldarğa toqtalsaq:
- 1. Ülken qajılıq nemese umra (kişi qajılıq).
Rasında bwl amaldar osı on kündiktiñ eñ ülken sauaptı amaldarınan ekendigine Payğambarımızdıñ (oğan Allahtıñ igiligi men sälemi bolsın) köptegen hadisteri dälel. Sol hadisterdiñ birinde bılay delingen: «…qabıl bolğan qajılıqtıñ sauabı - Jännat» (äl'-Buhari jäne Muslim).
- 2. Osı künderi oraza wstau.
Osı on kündikte oraza wstaudıñ sauaptı ekendigi jaylı Payğambarımızdıñ (oğan Allahtıñ igligi men sälemi bolsın) äyeli – Hafsa bılay degen: «Tört närseni Payğambar (oğan Allahtıñ igiligi men sälemi bolsın) qaldırmağan: `Aşura küni oraza twtu, Zul-Hijjanıñ on küninde oraza twtu, är ayda üş kün oraza twtu jäne tañ namazınıñ aldında eki räkäğat oqu» (Ahmad 6/287).
Hasan äl-Basri bılay aytqan: «Zul-Hijja ayınıñ on küninde oraza twtu, eki aylıq orazağa teñ» (Ibn Äbi Şäyba 4/292).
- 3. Täkbir (Allahu Akbar) jäne zikirdi (Allahtı eske alu) köbeytu Hajj süresiniñ 28-ayatına säykes: «…belgili künderi (yağni osı on kündikte) Allahtıñ esimin eske alıñdar!».
Bwğan baylanıstı Payğambarımız (oğan Allahtıñ igligi men sälemi bolsın) bılay degen: «endeşe bwd künderi täkbir, tählil jäne tähmidti köbeytiñder» (Ahmad).
- 4. Täubeni jañartu.
Rasında küna jasau tabiğatında bolğan adamzat üşin Rabbısınıñ keşirimdi jäne täubeni qabıl etuşi sipatı ümit sıylap, uayımın seyiltedi. Oğan baylanıstı Qwranda bılay delingen: «Äy, müminder! Tügel Allahqa täube qılıñdar! Qwtılarsıñdar». (Nwr: 31)
«Äy, müminder! Allahqa şınayı täube qılıñdar. Rabbılarıñ jamandıqtarıñdı joyıp, senderdi astarınan özender ağatın jännättarğa kirgizer». (Tahrim: 8)
- 5. Näpil qwlşılıqtardı köbeytu.
Sonıñ işinde: näpil namazdar, oraza, Qwran oqu, zikirler, sadaqa beru, jaqsılıqqa şaqıru, jamandıqtan qaytaru jäne t.b.
Aqiqatında bwl on kündikte istelgen amaldar sauap twrğısınan eselenedi.
Qwrmetti Jännattı ümit etken mwsılmandar! Osı berekeli de sauapqa, jaqsılıqqa tolı bolğan zor mümkindiñ uaqıtın bos ötkizip almay, joğarıda keltirgen jäne basqa da amaldardı ıqılaspen iske asıru arqılı är sätin paydalı da jemisti ötkizuge tırısayıq!
Taşimov Madibek
«Halifa Omar» meşitiniñ moldası
