31 qazan küngi respublikalıq «Egemen Qazaqstan» gazetinen KSRO halıq ärtisi Asanäli Äşimovtıñ «Ğwlama» attı maqalasın oqıp, tereñ oyğa qaldım. Onıñ üstine din ğwlaması, ğalım turalı öner adamınıñ oy tolğauı meni qattı tañdandardı. A.Äşimovtıñ elimizdegi dini ahualdıñ bügingi jağdayına alañdauı, Bas müfti jayındağı bağamdarı salmaqtı jazılğan. Maqalanıñ tükpirinde halqı, bolaşaq wrpağı üşin janwşırğan azamattıñ janayqayı jatır.
Avtor maqalanıñ basında-aq «qazaqta din bolmağan» dep keude soğatındarğa tayğa tañba basqanday etip jauap beripti. Dwrıs aytadı, bizdiñ asıl dinimiz Islam älimsaqtan bar. Eger biz äuel bastan dinsiz bolsaq, ata-babalarımız Imam Ağzam Abu Hanifa jolımen jürmegen bolsa, bügingidey beybit te tatu zamanğa jetken bolar ma edik? Joq, tentirep, wstağannıñ qolında, tistegenniñ auzında ketken bolar edik. Bizdiñ birligimiz ben berekemizge quat bergen, adamgerşiligimiz ben ar-namısımızğa nwrın sepken osı Islam dini. Jerimizdi jau basıp, wlımızdı qwl, qızımızdı küñ etken swrqiya zamanda da qazaqtığımızdı saqtap qalğanımız, moynımızğa bwğau salğızbağanımız dinimizdiñ arqası. Öytkeni, ol bizdi jauızdıqqa, qanişerlikke, soğısqa, öltiruge şaqırğan joq. Adal da meyirban, keñ peyildi de jomart bolğanımızdıñ arqasında Alla tağala bizge bügingidey täuelsizdik attı nığmetti wsındı. Aldımen osı üşin Alla tağala şükir etuimiz kerek.
Meniñ, äsirese, Asanäli Äşimovtıñ «Islam dinin örkendetu üşin oğan jalpıhalıqtıq qoldau qajet» degen wsınısı köñilime ornığıp qaldı. Iä, osılay jasağan jağdayda ğana dinimizdiñ bedeli biikterden körinip, abıroyı asqaqtay beretini sözsiz. Kerisinşe, qoğam arasında «dindi tek imamdar örkendetui kerek» degen qatıp qalğan jansaq qağida bar. Eger Islam dini san ğasırlar boyı wltımızdı wyıstırıp, tatulığımız ben twraqtılığımızdıñ jwlın mayı bolıp kelgen bolsa, endi täuelsizdik alğan kezeñde nelikten ol tek imamdardıñ jwmısı bolıp qaluı kerek? Jas buın dwrıs joldan adaspasın, wrpağımız wlağattı, qızdarımız qılığın joğaltpasın desek, bwl jwmıstı da jwmıla atqaruımız kerek. Jan-jağımızdan terrorizm men ekstremizmniñ salqını soğıp twrğanda qoğamda orın alğan keleñsizdikterdi bir-birimizden köru - qatelik. Öytkeni, qoğam – barşağa ortaq, demek, ondağı dert te barşağa birdey. Mine, osı jerde avtordıñ oyı qwptarlıq is.
Eñ bastısı, bwl maqalanı oqi otırıp men elimizdiñ Bas müftii şeyh Äbsattar qajı Derbisäli hazrettiñ jaña qırların tanıdım desem de boladı. Osığan deyin Äbsattar Derbisäliniñ dintanuşı, birneşe kitaptı düniege äkelgen tağlımı mol tanımı keñ ğalım, halıq üşin ayanbay eñbek etip kele jatqan dindar ekendigin ğana biletinbiz jäne halıq pen ziyalı qauım arasına altın köpir bolıp kele jatqandığına da kuä edik. Al, mına maqaladan Bas müftidiñ tek elimizdegi ğana emes, älemde orın alğan kikiljiñderdiñ ortasında bolıp, olardıñ oñ şeşim tabuına üles qosqandığın bildik. Sonday-aq, älem dinbasılarımen beybit qarım-qatınas ornatqan sayasatkerlik qabiletin de tanıdıq. Ayta bersek, Qazaqstan mwsılmandarı dini basqarması törağasınıñ jan-jaqtı twstarı, parasattı isteri jeterlik. Qısqasın aytqanda, maqalanı oqi otırıp, «Elbasılıq pen Dinbasılıq Allanıñ qalauımen ğana bolatın is» degen önegeli sözge köz jetkizgendey boldım.
Jalpı, maqalada soñğı on jıldıqta elimizde orın alğan igi dini ister qaz-qalpınşa berilgen. Är bölimdi oqığan sayın osınıñ barlığı rasımen jüzege asıp jatqandığın qwptaysıñ. Alısqa barmağannıñ özinde bizdiñ oblısta da köptegen jaqsılıqtar jüzege asıp keledi. Meşitterimiz keñeytilip, medrese jwmıs jasauda, uaqıt öte imamdarımız da tolığıp keledi. Meşitke keletin jamağattarımızdıñ da sanı artuda. Bas imamımız Amantay Sadievtiñ atqarıp jatqan qızmetine rizamız. Bwl da Bas müfti şeyh Äbsattar qajı Derbisäli hazrettiñ basşılıq etip otırğan QMDB jwmısınıñ jüyeliligin körsetedi, äri osınıñ barlığı bizdi, ağa buındı eriksiz quantadı.
Bolaşaqta da elimiz aman, halqımız beybit bolıp, Elbasımız ben Dinbasımız aman bolğay.
Orınğali QARASAEV,
respublikalıq därejedegi derbes zeynetker,
Atırau oblısınıñ Qwrmetti azamatı.
